'n Baie skaars bonus het 'n boer van Limpopo te beurt geval met die geboorte van tweelingbuffelkalwers op sy wildplaas naby Marken.
Mnr. Johan du Plessis van die plaas Boskaroo boer sowat 12 jaar met eksotiese wild maar het voor dié geboorte nog nie gehoor van 'n geboorte van tweelingbuffels nie.
"My plaasbestuurder het my gebel en gevra of ek al het gehoor het van tweelingbuffelkalwers," sê Du Plessis, wat in Pretoria woon en deeltyds boer. Sy bestuurder het hom ingelig dat 'n baie skaars geboorte van tweelingbuffelkalwers op Boskaroo plaasgevind het.
Vyfde plaaslike geval
Landbou.com het in 2013 berig van 'n buffelmeerling wat op 'n plaas naby Jongensfontein gebore is. Die boer op wie se plaas die geboorte plaasgevind het, mnr. Lood Goosen, het destyds vertel dat volgens sy ondersoek was daar nog net drie ander gevalle in Suid-Afrika waar buffels tweelingkalwers gehad het.
Dit maak dié geval die vyfde bevestige een in die land.
Du Plessis vertel hy teel met buffels en sy diere het 'n redelike goeie bloedlyn. Sy plaasbestuurder het maklik besef daar is 'n tweeling gebore omdat die koei die enigste dragtige een in die trop was.
Meerlinge by groter diersoorte
Volgens dr. Cindy Harper van die Universiteit van Pretoria se fakulteit veeartsenykunde is meerling by groter diersoorte baie skaars en is dit boonop nie maklik om tweelingkalwers in 'n buffelkudde te bevestig nie.
Dit gaan tans goed met die tweeling en albei drink aan hul ma.
"Die twee lyk albei redelik gesond, hulle loop by hulle ma en ons kyk elke dag of daar nie een is wat swakker word of begin uitval nie. Sover gaan dit goed met al twee," sê Du Plessis.
Hy sê ook hy beplan om uit te vind of 'n tweeling premiewaarde sal hê.
