Die landboudienstemaatskappy Afgri het sy bergvermoë vergroot deur vyf nuwe bunkers in drie provinsies te bou.
Die maatskappy het in ’n verklaring gesê hy het losstaande bunkers by Sandspruit in Mpumalanga en Bergville in KwaZulu-Natal gebou.
Die Sandspruit-bunker, naby Volksrust in Mpumalanga, is gebou nadat boere in die omgewing geraadpleeg is en ’n haalbaarheidstudie gedoen is. Die Bergville-omgewing het tradisioneel ’n tekort aan bergingsvermoë gehad omdat sowel somergraan en koring in die gebied verbou word.
“Graanprodusente is baie opgewonde oor die bunkers, omdat hulle nou die voordele geniet van die tegnologie wat Afgri in sy bergingsgeriewe bied,” sê mnr. Chris Venter, hoof uitvoerende beampte van Afgri
’n Verdere drie bunkers is by Afrikaskop en Eeram in die Vrystaat en Amersfoort in Mpumalanga opgerig.
In die Vrystaat is die bunkers naby Afgri se silo’s opgerig om te kan voorsien in die toenemende vraag na berging. Die Eeram-bunker sal vir somergraan gebruik word met al meer koring wat in Harrismith geberg word danksy Afgri Milling se nuwe koringmeul.
Buiten vir Sandspruit, waar nog vir finale goedkeuring gewag word, is alle Afgri-bunkers by Safex geregistreer en geniet daarom dieselfde voordele as silo’s.
Venter sê die bykomende bunkergeriewe hou groot voordeel vir boere in, omdat dit nader aan hul plase is, wat vervoerkoste verminder, en die graan volgens streng kriteria geberg word.
Bunkers is baie goedkoper om te bou en die groot voordeel is dat ’n bunker gebou kan word in die regte produksiegebied. Afgri bestuur altesame 15 losstaande en 8 tydelike bunkers in Suid-Afrika met 'n totale bergvermoë van 568 000 ton.
Venter sê hoewel hierdie bunkertegnologie maklik in Afrika opgerig kan word, lyk die mark anders. Sakke en pakhuisberging is meer algemeen is omdat boere op kleiner skaal boer en graanbestuur meestal nog nie op groot maat werk nie.
Afgri bestuur in Zamibië een bunker en agt pakhuise, in Uganda drie pakhuise en in Congo Braszaville een silosakgerief.
