Die hofaansoeke van mnr. Carel van der Merwe, wat in ’n opspraakwekkende en ingewikkelde likwidasiestryd met Land Bank betrokke is, is Dinsdag met koste in die hooggeregshof van afgewys. Regter Mpho Mamosebo het ook gelas dat kommissies van ondersoek sy sakebedrywighede bekyk.
Oomblikke ná die uitspraak in die hooggeregshof in Kimberley het Van der Merwe, van Van Wyksvlei, ’n aansoek om verlof tot appèl ingedien. Die regter het hierop hardop gewonder of die hof gyselaar gehou word omdat sy verplig is om eers dié aansoek Woensdagoggend aan te hoor alvorens betoë aangehoor word om die voorlopige likwidasie en sekwestrasie van sy twee maatskappye en trust te finaliseer. Sy vorige aansoeke dat die regter haarself moet verskoon en die saak uitgestel word, was ook onsuksesvol.
Van der Merwe se appèlaansoek teen sy sekwestrasie as individu is verlede maand deur die appèlhof afgewys. Van der Merwe, sy trust en maatskappye skuld die Land Bank meer as R80 miljoen. Die saak het vroeër opspraak gemaak omdat die kurator of likwidateur se wagte wat Van der Merwe se bates moes oppas by die verkeerde plaas opgedaag het. Dinsdag was nóg Van Der Merwe, sy prokureur, korrespondent prokureur of twee senior advokate in die hof teenwoordig terwyl die uitspraak in sy aansoeke gelewer is.
