‘n Afvaardiging van Sinograin, ‘n Chinese graanmaatskappy, besoek Suid-Afrika tans om moontlikhede vir handel te ondersoek.
Dr. Pieter Mulder, adjunk-minister van Landbou, Bosbou en Visserye, sê die Chinese afvaardiging is Maandag (13 September) ingelig oor hoe die landbou, veral die graanbedryf, plaaslik werk.
“Vandag (14 September) word hulle in die Kaap rondgeneem om te sien hoe dinge daar werk,” vertel Mulder. Die hoof uitvoerende beampte van die maatskappy, wat ook op die Chinese Staatsraad (dit is gelyk aan Suid-Afrika se Kabinet) dien, vergesel die afvaardiging.
Volgens Mulder oorweeg die afvaardiging ook na moontlikhede vir beleggings in infrastruktuur. Die groep moet terugrapporteer aan die Chinese regering.
Mulder sê intussen gaan onderhandelinge voort tussen die Departement van Landbou, Bosbou en Visserye en die Chinese regering oor die moontlike uitvoer van die huidige mielie-oorskot.
Samewerking is moontlik
Mulder het tydens ‘n dinee in Johannesburg, waar die maatskappy onthaal is, opgemerk: “China en Suid-Afrika kan mekaar vind in belang van albei lande wat graanuitvoere en oliesade aanbetref.
“Die Suid-Afrikaanse graanbedryf is in staat om meer te produseer as wat binnelands en in die omliggende buurlande verbruik kan word. Daarom is voedselsekuriteit nie in gedrang as daar aggressief gesoek word na alternatiewe markte vir ons grane nie,” verduidelik Mulder.
Mulder meen die plaaslike graanbedryf gaan versmoor as alternatiewe markte in Afrika of China nie ondersoek word nie.
“Omdat die Regering tans mielies uitsluit by etanolvervaardiging, moet nuwe markte vir die graanbedryf gesoek word. China is beslis só ’n mark. Wat moontlike graanuitvoer na China betref, het Suid-Afrika ‘n liggingsvoordeel én ’n prysvoordeel. Ons kan topgehalte graan vinniger in China kry as meeste ander lande,” sê Mulder.
14 September 2010
