Dié nederige klein takie sal jou ’n gevoel van trots gee, het McRaven die studente verseker. Jy sal genoeg trots kry om jou aan te moedig om nog ’n taak aan te pak, en dan nog een en nog een . . .
“Teen die einde van die dag het daardie een taak wat jy aan die begin van die dag afgehandel het, opgebou tot ’n reeks voltooide take. Om jou bed op te maak, versterk ook die idee dat die klein dinge in die lewe saakmaak. Want hoe suksesvol gaan jy met die groot dinge wees as jy nie die klein dinge kan regkry nie?”
Ek het onwillekeurig aan McRaven se woorde gedink toe ek verlede week op die sewende verdieping van die Duitse departement van buitelandse sake middagete geniet het met ’n onverbeterlike uitsig oor Berlyn.
