Mnr. Chris Sturgess het op 1 Januarie die senior hoofbestuurderleisels van die JSE se kommoditeitsafdeling, Safex, by mnr. Rod Gravelet- Blondin oorgeneem.
“Die doel van Safex was nog altyd om ’n meganisme daar te stel waarmee landboukommoditeitspryse bestuur kan word. Dít sal nie verander nie. Ons is wel opgewonde oor ’n paar projekte wat onder meer kan help om die mark in die toekoms deursigtiger te maak,” sê Sturgess.
Daar word tans gewerk aan ’n projek wat sal dien as die basis vir kontantverhandeling op die mark.
Sturgess meen dié projek kan uiteindelik help om die graanverhandelingsproses deursigtiger te maak, sodat produsente meer gemoedsrus sal hê oor veelbesproke kwessies, soos die vervoerdifferensiaal.
Gravelet-Blondin sal steeds as konsultant betrokke bly.
3 Januarie 2012
