Nadat die Britse TV-aanbieder Jeremy Clarkson geruime tyd met sy plaaslike distriksraad in ’n stryd gewikkel was om ’n restaurant op sy plaas Diddly Squat in Oxfordshire te ontwikkel, is dié planne nou van die baan.
Volgens ’n Sky News-artikel het hy aangekondig dat hy nie meer belang stel om verder te gaan met sy ontwikkelingsplanne nie.
Clarkson het aanvanklik aansoek gedoen om ’n restaurant met sitplek vir 50 mense, saam met ’n kombuis, bedienings- en sitarea, in ’n “onderbenutte” lamskuur in te rig. Verder wou hy ook die parkeerarea, wat reeds daar was vir besoekers aan die Diddly Squat-plaaswinkel, vergroot.
Hoewel dié aansoek afgekeur is, het Clarkson nogtans ’n restaurant oopgemaak nadat hy beweer het dat hulle ’n skuiwergat gevind het wat hom kon toelaat om dit te doen. Die Wes-Oxfordshire-distriksraad het egter in antwoord hierop aan Clarkson ’n afdwingingsbevel gestuur om die restaurant te sluit. Ná dié bevel het Clarkson besluit het om die idee heeltemal te laat vaar.
In die Sky News-artikel sê Clarkson hy is teleurstel. Hy meen die restaurant sou deel wees van ’n groter plan om beter landboubedrywighede op sy plaas te bewerkstellig. Clarkson besit die plaas al sedert 2008, maar het eers in 2019 besluit om self te boer nadat die plaasbestuurder afgetree het.
Hy wou onder meer hoender- en koeimis pleks van chemikalieë as bemesting gebruik. Pleks daarvan om sy beeste te verkoop, sou hy die beesvleis wat op die plaas geproduseer is, in sy restaurant voorsit.
“Toestemming hiervoor is geweier. En ons pogings om dié probleem te omseil deur toegelate ontwikkelingsregte te gebruik, en om die restaurant in ons sogenaamde Lowland Barn oop te maak, is verydel deur die afdwingingsbevel,” het hy volgens Sky News gesê. “As gevolg hiervan moes ek die meeste van my verkoop. En nou gebruik ek weer chemikalieë. Ek wil nie meer ’n restaurant oopmaak nie.”
Clarkson se bure deel egter nie almal in sy teleurstelling nie. Luidens ’n berig in die Oxford Mail veroorsaak besoekers aan sy plaaswinkel dikwels verkeersknope. Dit is ongerieflik vir mense wat in die omgewing woon of daar verby moet reis. Sky News berig daar was 69 besware teen Clarkson se restaurant met 17 mense wat dit ondersteun het.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
