Die DA sal die laaste sê oor die nasionalisering van Suid-Afrika se landbou-, mynbou- en banksektor hê, sê mnr. Justice Malala, bekende politieke ontleder en rubriekskrywer.
Hy het op die Melkprodusente-organisasie se kongres op Howick, KwaZulu-Natal, gesê die publiek moet ontspan oor die uitsprake van mnr. Julius Malema, ANC-jeugligaleier.
“Baie water moet in die see loop voor sy uiters verbale nasionaliseringsplanne regeringsbeleid sal word,” het Malala gesê. Malema sal eerstens die ANC-kongres moet oortuig om dit dié party se beleid te maak.
Meerderheid nodig
Die vinnigste wat hy dít sal kan bewerkstellig, is teen volgende jaar as die party in Bloemfontein vergader. Dit sal ook net beleid word as die meerderheid van die party vír nasionalisering stem.
“Dinge tel nie op die oomblik in Malema se guns nie. Limpopo is die enigste provinsie wat nasionalisering daadwerklik steun. Kwa-Zulu-Natal – die enigste provinsie waar die party se steun groei – is teen dié opsie gekant.”
Malala sê selfs al sou Malema dit regkry om die ANC te oortuig dat nasionalisering die toekoms is, moet die Parlement steeds besluit dat die Grondwet aangepas moet word. Dáárvoor is ’n tweederdemeerderheid nodig. Dus lyk dinge nie gunstig vir Malema nie, sê Malala.
“In 2009 het die ANC die verkiesing met 65,9% gewen, terwyl die DA net 16,6% van die stemme kon werf. Verlede jaar het die ANC se steun afgeneem en die party het 62% van die stemme gewen.”
Koalisie
Dit beteken die ANC sal ’n koalisie met ’n ander party moet bewerkstellig as hy ’n beleid van nasionalisering wil goedkeur. “En nie enige party nie. Dit sal die DA moet wees. Alle ander partye se steun wankel.”
Malala meen Malema weet hy is besig om ’n politieke stryd te verloor. “Hy gaan ál harder begin skreeu, want dít is al hoe hy kan oorleef.” Malala sê mense moet eerder bekommerd wees oor die tekort aan ander stemme in die openbare debat.
Hy het landbouleiers aangemoedig om hul stem dik te maak in dié verband. Hy sê dié debat gaan aanhou – met of sonder Malema. “Onthou net, dié debat is nie beperk tot Suid- Afrika nie. Nasionalisering vind wêreldwyd plaas.”
5 Oktober 2011
