Pres. Jacob Zuma het vanjaar die slegste punt nóg in die DA se jaarlikse beoordeling van die Kabinet gevaar.
Die DA gee hom slegs een uit tien. Volgens die mnr. Mmusi Maimane, die DA se leier in die Parlement, is die werklikheid dat Zuma nie net druip as die president van die land nie, maar dat die meerderheid van sy ministers óók druip.
Die rede vir dié lae punt is onder meer die president se onwilligheid om vrae in die Nasionale Vergadering te beantwoord. “Pres. Zuma het sedert November 2013 nie ‘n hele reeks vrae in die Parlement beantwoord nie, wat strydig is met die reëls van die Parlement, wat van hom verlang om dit een keer per termyn te doen.”
Zuma het ook elke moontlike poging aangewend om verantwoordbaarheid vir die Nkandla-kwessie te ontduik, sê Maimane. Ander redes wat uitgelig is, is die energiekrisis waarin die land is, die R30 miljard wat jaarliks weens bedrog en korrupsie verloor word, die polisiëring van die staat se kommunikasiedienste asook onafhanklike instellings binne die strafregtelike stelsel.
Mnr. Senzeni Zokwana, Minister van Landbou, Bosbou en Visserye, en mnr. Gugile Nkwinti, het vanjaar baie goed gevaar. Hierdie is Zokwana se eerste beoordelingsjaar en hy het met 'n vyf uit 10 weggespring. Sy voorganger, me. Tina Joemat-Pettersson, het verlede jaar 'n F-simbool gekry. Toe sy as Minister vir die portefeulje in 2009 aangestel was, het sy 'n B gekry, die daaropvolgende jaar 'n E en die jare daarna 'n F.
Zokwana kry sy goeie punt vanweë die pluimpie van die ouditeur-generaal dat hy beter bestuurspraktyke in sy departement ingestel het. Hy is ook oor die algemeen oop vir bydraes van die DA, maar het baie min beleidsvoorstelle voorgestel om sy departement te verbeter. Die Fetsa Tlala-voedselprogram, wat gebruik word vir ANC-verkiesingsveldtogte, is egter die meulsteen om sy departement se nek.
Nkwinti antwoord sy parlementêre vrae redelik volledig en is oop vir parlementêre oorsig. Maar die DA is erg bekommerd oor die vaagheid oor die werksaamhede by die Ingonyama Trust. Maar een van die grootste flaters wat Nkwinti vanjaar begaan het, was sy onwerkbare voorstel van 'n afdwingbare 50/50-grondeinaarskap tussen plaaseienaar en werkers, wat vernietigende gevolge vir belegging in boerdery gehad het.
