Sowat 12 000 wapens van die Suid-Afrikaanse Polisiediens is die afgelope vyf jaar as gesteel of verloor aangemeld en slegs 7% van die vermiste wapens word glo teruggevind, aldus die Demokratiese Alliansie (DA).
Luidens ’n verklaring is dié inligting aan me. Dianne Kohler-Barnard, die party se woordvoerder oor veiligheid, verskaf na aanleiding van vrae wat sy aan mnr. Nathi Mththwa, die Minister van die Polisie, gestel het.
Volgens Mthethwa is 1 335 wapens in die 2010/’11-boekjaar “verloor of gesteel”. Altesaam 167 van dié wapens is teruggevind. Die polisie se statistiek het aangedui dat 1 923 wapens in 2007 gesteel is. In 2008 was dit 2 507, terwyl dit in 2009 2 944 was. In 2010 het die getal op 3 226 te staan gekom.
R16 miljoen
Intussen het Kohler-Barnard in Januarie verlede jaar bekend gemaak dat 4 000 nuwe pistole vir SAPD-lede bestel moes word omdat hul wapens gesteel is of hulle dit verloor het. Dit het die belastingbetaler R16 miljoen gekos teen R4 000 per pistool.
Kohler-Barnard sê die DA is oortuig dat baie van dié gesteelde wapens in die hande van misdadigers is en sy het ’n vraag aan Mthethwa gevra om vas te stel hoeveel lede van die polisie of die publiek al met ’n vermiste SAPD-wapen geskiet is. Sy wag tans op sy antwoord.
Van die oplossings wat Kohler-Barnard voorstel, is dat ’n strenger beleid ingestel moet word vir dissiplinêre stappe teen SAPD-lede wat hul wapens verloor. Sy sê die betrokke lede moet ook verantwoordelik gehou word vir die koste van die verlore wapen.
12 September 2011
