Strafregtelike klagte van crimen injuria staar Greg Miles van die plaas Bare Acres naby Stutterheim in die gesig en moontlik ook ’n ondersoek van die Menseregtekommissie (MRK) ná ’n konfrontasie tussen hom en twee inspekteurs van die Dierebeskermingsvereniging (DBV).
Navesh Singh en Kevin Khumalo, wat in Vereeniging gestasioneer is, het in Desember verlede jaar al die pad van Johannesburg af gereis om hul onaangekondigde verskyning in ’n ongemerkte voertuig op Miles se plaas te maak.
Ná ’n hewige woordewisseling tussen Miles en die inspekteurs, wat Miles grootliks op sy foon opgeneem het, is die inspekteurs daar weg. “Ja, ons het woorde gehad,” gee Miles toe, “maar dit was onder meer in die tyd toe misdadigers in polisie-uniforms en ongemerke voertuie of plase oopgedaag het, en ons almal was ’n bietjie op hol.”
