Hy is in 2017 tot president van dié organisasie verkies en is die eerste Suid-Afrikaner wat die posisie te beklee. Dit is die eerste keer dat iemand tot president herkies is. Die kommersiële-boere-unie van Zimbabwe, waarvan De Jager ’n erelid is, het hom vir die posisie benoem.
“De Jager is ’n uiters gerespekteerde landbouleier en word reg oor die wêreld baie hoog geag vir sy leierskap, kundigheid en versiendheid. Suid-Afrika is geseënd om ’n leier van sy kaliber te hê. Die agting vir hom by wêreldleiers, en nie net in die landbou nie, word oral gesien, erken en waardeer,” sê mnr. Leon Borcherds, direkteur van Saai.
Mnr. Francois Rossouw, uitvoerende hoof van Saai, sê in sy eerste termyn as president van die WBO het De Jager verskeie landboustrukture reg oor die wêreld besoek. Hy kon eerstehands sien hoe strukture elders werk, asook wat die doeltreffendste en volhoubaarste model vir die organisering in die landbou is. “Saai is die produk daarvan. As medestigterslid het hy Saai as belangenetwerk geskoei op ’n nasionale eenheidstruktuur wat gebruik maak van digitale tegnologie en netwerkooreenkomste om familieboere se belange te dien.”
De Jager is ’n voormalige president van Agri Limpopo, die Pan African Farmers’ Organisation (Pafo) en die Suider-Afrikaanse konfederasie van landbou-unies (Sacau), en ’n voormalige visepresident van Agri SA. Hy dien ook as voorsitter van Agri All Africa, die organisasie wat Suid-Afrikaanse en Zimbabwiese boere se belange in Afrika beskerm en bevorder.
Die WBO bestaan uit ’n groot aantal landbou-organisasies en landbouvennootskappe. Die organisasie verteenwoordig ongeveer 1,5 miljard boere in 54 lande reg oor die wêreld. Die WBO verteenwoordig ook die landbougemeenskap by die Verenigde Nasies (VN).
De Jager het sedert 2017 internasionale steun veel wyer as vanuit die landbougemeenskap vir ’n boergedrewe agenda vir klimaatsverandering gewerf, wat veral by die VN en sy agentskappe groot byval gevind het. Hy is vasbeslote om verder aan dié agenda te werk om namens boere ’n globale burgerlike voorstel oor die bestuur van klimaatsverandering aan die VN te maak.
Ná verskeie vergaderings met die Europese Unie en Russiese landbou-unies, en teen die agtergrond van toenemende handelspanning, beskou hy die beskerming van boere se toegang tot markte, veral in bederfbare voedselprodukte, as ’n voorrangsaak vir sy tweede termyn. Hy glo die digitalisering van die landbou hou groot geleenthede vir Afrika in. Hy is ’n kampvegter vir die modernisering, meganisering en kommersialisering van kleinskaalse landbou deur vennootskapsmodelle in Afrika te vestig.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
