Die belangstelling onder Suid-Afrikaanse boere om meer oor landbou-omstandighede in Georgië uit te vind is só groot dat ’n derde inligtingstoer nou aangebied gaan word.
Minstens 45 boere gaan reeds tussen 24 en 29 Januarie sowel as 7 tot 11 Februarie dié land besoek om eerstehands na beskikbare plase en die landbou-omstandighede te kyk. Die inligtingstoere spruit voort uit die TLU SA se ooreenkoms met Georgië om die land se landbou-sektor te help regruk ná die agteruitgang toe dit nog deel van die ou Sowjet-unie was.
Mnr. Bennie van Zyl, hoofbestuurder van TLU SA, sê na aanleiding van al die navrae wat ontvang is, word ‘n derde toer beplan vir die week van 21 tot 25 Februarie. Die inskrywingsvorm vir die toer is op die webblad www.boers.ge en is die sluitingsdatum vir die toer op 7 Februarie 2011.
Skakel tussen SA en Georgië
Van Zyl is reeds meer as ’n maand in Georgië om as skakel met Suid-Afrika te dien. Prof Koos de la Rey, ’n ekonoom van die TLU SA en dr. Ben Stander, ’n landboukundige, staan hom by.
Van Zyl sê in die eerste week nadat ’n webblad oor landbougeleenthede in Georgië begin is, was daar reeds 56 000 besoeke op die blad. “Daarbenewens het ek by tye tot 60 e-posnavrae per uur ontvang en kon nie voorbly om mense van inligting te voorsien nie. Daar was meer as 1 500 navrae oor die inligtingstoere.”
Die toere word deur die Georgiese regering aangebied om belangstellendes ’n beter oorsig oor geleenthede in die landbou te bied.
Een TLU lid wat reeds besluit het om hom in Georgië te vestig is mnr. Piet Kemp, bestuurder van die TLU SA Oos. Hy is ’n vennootskap aangebied om ’n saai- en beesplaas vir die eienaars van ’n myngroep in dié land te vestig. Mnr. Riaan Taylor, is nog ’n boer wat beplan om hom daar te vestig. Hy beoog ’n botteleringsaanleg vir water en ’n saaiboerdery.
17 Januarie 2011
