Die Van Ryn’s-distilleerdery naby Stellenbosch het pas sy derde opeenvolgende trofee vir beste brandewyn by die International Spirits Challenge (ISC) van 2010 in Londen ontvang.
Dié keer het die keuse geval op die 15 Year Old Fine Cask Reserve as die wêreld se beste brandewyn.
Mnr. Neil Mathieson, die kompetisie se kategorievoorsitter vir konjak, armanjak en brandewyn, het gesê: “Dit was vanjaar ’n baie moeilike besluit om die trofee vir die beste brandewyn toe te ken, want al die produkte wat ingeskryf is, was puik, en het almal baie hoë punte gekry. Uiteindelik is die besluit om die trofee aan Van Ryn’s se 15 Year Old toe te ken uit erkenning vir sy uitmuntende lengte, subtiliteit en smaakdiepte.”
Kenner van brandewyne
Mathieson, ’n internasionaal gereken as ? kenner van brandewyne en ander druiwe-gebaseerde spiritualieë van oor die wêreld. Hy glo Suid-Afrika se brandewyne word die standaard vir verouderde brandewynprodukte van gehalte buite Frankryk se AOC-streke.
In 2008 en 2009 het die paneel van spiritualie-kenners by die ISC Van Ryn’s se 12 Year Old Distillers Reserve as die beste aangewys.
Van Ryn’s het ook reeds drie keer die trofee as Beste Brandewyn ter Wêreld van die International Wine & Spirit Competition (IWSC) huis toe gebring, en is dus reeds ses keer as die produsent van die heel beste brandewynproduk aangewys.
Me. Adele Ankiewicz, Van Ryn’s se globale bemarkingsbestuurder, het gesê: “Dié resultate bewys die distilleerdery handhaaf ’n merkwaardig bestendige standaard, en weerspieël Suid-Afrika se brandewyn-uitnemendheid.”
19 November 2010
