Versigtige optimisme heers dat die komende seisoen verligting vir Suid-Afrika se geknelde somersaaigebied mag bring, hoewel later as normaalweg oor veral die westelike dele.
Die SA Weerdiens sê in sy jongste vooruitskouing die waarskynlikheid dat ’n swak La Niña teen die aanbreek van die somer kan ontwikkel, bly laag. Daar is egter aanduidings dat kanse op bogemiddelde reënval teen die midsomer kan verbeter.
Die vlakke van onsekerheid oor die akkuraatheid van dié vooruitskouings bly nietemin hoog, waarsku die Weerdiens.
Ernstig droog
“Ernstige droogtetoestande duur steeds oor die meeste dele van die land voort. Ongeag vooruitsigte van ’n bitter nodige natter seisoen, is dit hoogs aan te beveel dat die voortslepende streeksdroogte in berekening gehou word. Die situasie is steeds delikaat. Soos altyd is die aanbeveling dat medium- tot korttermyn-voorspellings dopgehou word omdat dit die heersende vooruitskouing kan verander,” lui die weerdiens se verklaring.
Mnr. Johan van den Berg, klimatoloog van Santam Landbou, meen die gekombineerde uitwerking van ’n neutrale tot swak La Niña en negatiewe Indiese Oseaan Dipool kan gunstige reënvaltoestande in die middel tot laat somer vir Suider-Afrika bring.
Hoewel die begin van die reënseisoen in party dele later as normaalweg kan aanbreek, kan dit steeds betyds wees vir aanplantings binne die optimale tye, sê hy, en deur normale tot bogemiddelde reënval in die mid- tot laatsomer opgevolg word.
Optimale planttyd
Intussen is almal se oë op die wolke terwyl die oostelike produksiegebiede sy optimale planttyd vanaf middel Oktober binnegaan, en die westelike helfte se gunstigste planttyd, vanaf middel Desember, al hoe nader kom.
Die gemengde seine en onsekerheid in weervooruitskouings weeg in hierdie stadium swaar op die plaaslike mieliebedryf, sê mnr. Wandile Sihlobo, ekonoom van die landbousakekamer Agbiz.
Oesverwagtinge
’n Hele paar organisasies skets ’n positiewe prentjie van Suid-Afrika se verwagte 2016/’17-oes, sê hy. Vooruitskattings is tot so hoog as 13 miljoen ton.
Agbiz voorspel ’n nasionale oes in die omgewing van 11,8 miljoen ton. “Ons sal egter die weervooruitskouings dophou en ons siening in die toekoms dienooreenkomstig aanpas,” sê Sihlobo.
