Dit sal ’n halwe waarheid wees
om te sê hy laat ’n leemte. Die afsterwe van dr. André Ernst (68) van
Allesbeste-kwekery, -boerdery en -padstal op Tzaneen laat nie net ’n leemte
nie, maar ook ’n ryk erfenis vir die avokadobedryf wêreldwyd, vir die landbou
in Suid-Afrika en vir sy geliefdes, kinders en kleinkinders en elkeen wat hom
geken het.
Hy was ’n pionier op vele gebiede. André het elke greintjie kennis wat hy deur sy onblusbare passie, weetgierigheid en navorsing opgedoen het, oorgedra sodra hy dit beproef en bevestig het. Dit geld nie net die landbou nie, maar ook in besigheid, verhoudings bou, menswees en leierskap.
Hy was in 1980 die derde geslag wat hom by die familieboerdery aangesluit het, en het onmiddellik met die oprigting van die nou wêreldbekende Allesbeste-kwekery begin. Hy het in 1984 ’n doktorsgraad verwerf oor die wortelontwikkeling van avokado-steggies.
Gedurende die vroeë 1990’s het André met die aanplant van avokado’s, pleks van bloekombome, begin – alles uit die Allesbeste-kwekery. Dit het ’n nuwe era van avokado’s se oorheersing in die boerdery ingelei.
Vir sy werk op klonale onderstamme vir avokado’s is hy wêreldwyd bekend. Sý revolusionêre mikrokloning staan in die kwekerybedryf as die Allesbeste-metode bekend.
Die Maluma-kultivar is ’n meer algemeen bekende deel van sy nalatenskap en ’n getuienis van sy goeie menseverhoudinge.
Toe mnr. Dries Joubert op ’n boom met besonderse avokado’s op sy plaas Maluma by Levubu in Limpopo afkom, kon hy sy vonds met enige avokweker deel, maar hy het reguit na André gekom. Onder sy leiding is die kultivar ontwikkel en plantersregte is geregistreer vir hierdie eerste eg Suid-Afrikaanse avokadokultivar met ’n eie handelsmerk.
In 1995 is André as Boer van die Jaar in aangewys deur die Landbouskrywersvereniging van Transvaal en in 2003 het die plaaslike Rotariërs hom vir sy uitstekende bydrae tot die avokadobedryf vereer. In 2015 is sy jongste seun, Zander, as Agri Limpopo se Jongboer van die Jaar bekroon en in 2016 is Allesbeste as Suid-Afrika se Boer van die Jaar bekroon deur die Landbouskrywersvereniging.
“Dit is omdat ons niks net so aanvaar nie. Ons toets voortdurend die grense en verplaas hulle. Ons betree daagliks nuwe paradigmas van produksie,” was André se verduideliking vir die sukses wat hy saam met sy vrou, Liezel, en sy twee seuns, Edrean en Zander, in hul familieboerdery bereik het. Hy los die boerdery nou in hul bekwame hande. Edrean boer al van 2007 af en Zander van 2009 af sy aan sy saam met hul pa.
Saam met Liezel, Edrean en Zander laat André ook sy dogter, Larissa, stiefseun Ronald, sy broers, Etienne en Johan, en suster, Irma, saam met sy vyf kleinkinders agter. Sy sesde kleinkind sal eersdaags gebore word.
