’n Vergadering om die Dieregesondheidsforum weer in die lewe te roep-, is onlangs gehou en komiteelede is verkies. Luidens ’n nuusbrief van die Melkprodusente-organisasie (MPO) het die krisis met bek-en-klouseer wat die land tans teister, die bedryf net weer die belangrikheid van so ’n organisasie laat besef.
Die forum is oorspronklik in 2007 gestig. ’n Griefskrif oor heersende probleme en voorgestelde oplossings vir die land se veeartsenydiens is toe reeds aan die Minister van Landbou voorgelê. Geen formele erkenning is tot op hede nog van die Regering oor dié griefskrif ontvang nie.
Effektiewe kommunikasie
“Die huidige bek-en-klouseer-krisis het lede van die Forum weer laat besef dat daar ’n ernstige behoefte is dat die Regering hierdie forum deurlopend moet gebruik en nie slegs om krisisse te voorkom nie. Dit is daarom noodsaaklik dat ’n doeltreffende kommmunikasiestelsel gevestig word,” lui die nuusbrief.
Dr. Pieter Verdoorn is tot voorsitter van die forum verkies, terwyl mnr. Dave Ford die ondervoorsitter is en drr. Danie Odendaal en Langa Simela bykomende komiteelede.
Prestasie in krisis
Te midde van die krisis wat die land se uitvoerstatus sedert 25 Februarie vanjaar beïnvloed, was suiweluitvoer vir die eerste kwartaal vanjaar 87% hoër as vir dieselfde tydperk verlede jaar. Die MPO sê: “Op ? melk-ekwivalentbasis is 23,7 miljoen liter uitgevoer, vergeleke met 12,7 miljoen liter in dieselfde tydperk verlede jaar. Invoer gedurende die eerste kwartaal het ook toegeneem, hoewel nie teen dieselfde tempo as uitvoer nie.”
Dr. Koos Coetzee, die MPO se ekonoom, sê die verhoogde uitvoer is ’n aanduiding dat Afrika-markte van die resessie herstel. As dié neiging voortduur, kan die totale uitvoer vir vanjaar die totale invoer oorskry.
8 April 2011
