Petrol en diesel sal moontlik as geskenke vir Valentynsdag oorweeg kan word noudat ekonome nog ‘n styging in Februarie voorspel.
Mnr. Tony Twine van die Econometrix-groep voorspel dat die prys van diesel met 10c per liter kan styg, terwyl petrol 11c per liter duurder kan wees. Met dié styging sal die prys vir ‘n liter petrol in Gauteng net onder die R8,90 per liter kos.
“Afhangende van wat die rand/dollar-wisselkoers en die internasionale olieprys doen kan die styging hoër wees,” aldus Twine.
Swakker dollar
Hy sê sedert die begin van Januarie het die internasionale olieprys rondom die $94 per vat beweeg, terwyl die rand effens verswak het. Twine meen dat die dollar tans swak is, en dat dit verder kan verswak, wat ‘n invloed op oliepryse sal hê.
“Dit beteken egter tot ‘n mate ‘n sterker rand, wat dié effek kan buffer. Ons verwag wel dat die rand deur die loop van die jaar gaan verswak.”
Volgens Twine het die hoë vraag na diesel en ander brandstowwe weens die koue winter in die noordelike halfron ook ‘n invloed op die hoë oliepryse.
10 Januarie 2011
