Dr. Requier Wait, hoof van ekonomie en handel by Agri SA, meen die nuwe stelsel sal in die begroting van Februarie volgende jaar aangekondig word. “Teen die middel van volgende jaar behoort daar nuwe wetgewing vir kommentaar beskikbaar te wees en die waarskynlike inwerkingstelling van ’n nuwe stelsel kan teen 2020 moontlik wees.”
Mnr. Mark Kingon, waarnemende kommissaris van die SAID, het op ’n onlangse parlementêre bespreking van die organisasie se jaarverslag bevestig dat werk gemaak word van die klagtes wat die Belastingombud daaroor ontvang het. Daar word onder meer gekyk om die rekeninge vir boere se BTW-eise en dieselrabatterugbetalings te skei. Dit is tans administratief gekoppel en lei tot vertragings.
’n Opname wat Wait en me. Erika de Villiers van die SA Instituut van Belastingkundiges (SAIT) gedoen het, het getoon 42% van respondente wat sedert die begin van verlede jaar aan die opname deelgeneem het, het vertragings ondervind. Van hulle moes sowat 47% vir twee tot ses maande wag, 23% vir ses maande tot ’n jaar en 10% langer as ’n jaar.
Weens al die klagtes met die terugbetalings van eise het die kantoor van die Belastingombud in ’n stadium oorweeg om te vra dat dit as ’n stelselprobleem verklaar moet word, wat ’n volledige ondersoek vereis. Indien dit as ’n stelselprobleem verklaar word, kan belastingbetalers die Belastingombud regstreeks nader sonder om eers hulp by die SAID se inbelsentrum en interne klagtekantoor te soek.
Die erns van vertragings met terugbetalings aan belastingbetalers in die algemeen het duidelik geblyk uit mnr. Tito Mboweni, Minister van Finansies, se mediumtermyn-beleidsverklaring. Mboweni het luidens die verklaring onder meer bekend gemaak dat R20 miljard se BTW-terugbetalings gedoen moet word. Daarvan is R11 miljard agterstallige geld wat teruggehou is en R8 miljard wat nog in dié begrotingsjaar (2018-’19) verskuldig is.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
