Die afgelope drie maande is daar reeds 23 Land Cruiser bakkies in die Vryheid-omgewing van KwaZulu-Natal gesteel. “Hoewel ons reeds ’n paar teruggevind het, het ons nog lank nie die oorlog gewen nie,” sê mnr. Ken Taylor, lid van die Kambula-boerevereniging en plaaslike polisieforum.
Die polisieforum het pas ’n plaaslike onderwyser se Toyota Tazz teruggevind. “Hierdie motor het ’n opspoortoestel in gehad, maar die diewe het ’n toestel gehad wat alle seine wat die opspoor-toestel moes uitstuur, geblokkeer het,” sê Taylor.
Hoewel daar nie vermoede is dat hierdie diefstal deur dieselfde sindikaat gepleeg is as wat die Land Cruiser-bakkies steel nie, maak die blokkering-tegnologie Taylor senuagtig. “As die sindikaat, wat hierdie bakkies glo op bestelling vir ’n mark in Mosambiek steel, hierdie tegnologie gebruik, dan is ons missie om hierdie sindikaat stop te sit aansienlik bemoeilik.
“Ons het egter ’n goeie netwerk gevestig en ons sal verseker nie handdoek ingooi nie,” het Taylor gesê.
