Drastiese verandering is onvermydelik en die landbou sal vinnig moet aanpas om voedselsekerheid te bewerkstellig, het verskeie sprekers by die Misstofvereniging van Suider-Afrika se jaarlikse kongres gesê.
“Ons moet ons manier van dink en ons houding verander om volhoubaar te boer,” het prof. Izak Groenewald, van die Sentrum vir Volhoubare Landbou aan die Vrystaatse Universiteit tydens die Misstofvereniging van Suider-Afrika (MVSA), voorheen die Misstofvereniging van Suid-Afrika, se jaarlike kongres gesê.
Dié vereniging het op gelyke voet met veranderinge in die bedryf ’n naamsverandering ondergaan en ’n nuwe grondwet goedgekeur om aan vereistes van die Maatskappyewet van 2008 te voldoen. Die jaarlikse kongres het op 10 Junie vanjaar by die Indaba Hotel in Johannesburg plaasgevind en die tema was Volhoubaarheid.
“Die misstofbedryf het drasties verander,” het mnr. Adriaan de Lange, voorsitter van die MVSA, gesê. “Die waardeketting bestaan nie meer uit ’n paar groot verskaffers wat álles dek nie, maar uit verskeie vlakke van belanghebbendes.”
Volgens Groenewald sal ekologiese, ekonomiese en sosiale faktore in ’n groter mate in ag geneem moet word om volhoubaar te boer. “Met ander woorde, ons moet korttermynoorlewing en langtermyndoelwitte balanseer.”
Een van die kernvrae wat tydens die kongres aangespreek is, is hoe om dualisme in die landbou (kommersiële boere aan die een kant van die spektrum en landelike bestaans- en kleinboere aan die ander kant) te bestuur om voedselsekerheid te bewerkstellig.
Volgens dr. Jack Armour, landbou-ekonoom en bedryfsbestuurder van Vrystaat Landbou, sal meer klein- en bestaansboere móét oorbeweeg na die kommersiële kant van die spektrum. “Maar ons moet in gedagte hou dat landelike gemeenskappe afhanklik is van plaaslike kleinboere vir korttermynoorlewing. Die hele bedryf moet hiermee help deur opleiding, mentorskap en toegang tot markte, finansiering en inligting te verskaf.”
