Suid-Afrika se saaigronde het in die afgelope 20 jaar met die ekwivalent van 2 ton kalk per hektaar versuur omdat boere eenvoudig nie genoeg kalk toedien nie, sê mnr. Etienne Schoeman, besturende direkteur van die kalkmaatskappy Grasland.
Hy was deel van ’n Nasie in Gesprek-sessie op die Nampo-Oesdag oor onder meer grondgesondheid onder leiding van mnr. Chris Burgess, redakteur van Landbouweekblad. Schoeman vermoed die rede vir boere se gebrekkige kalktoediening is ’n kontantprobleem.
“Maar boere moet besef dat die ekostelsel, biologiese aktiwiteit en die doeltreffendheid van misstowwe in die grond deur die korrekte pH bepaal word.”
Bewaringslandbou
Oor bewaringslandbou en die aanvaarding van geenbewerking het mnr. Pieter Smit, produkbestuurder van Monsanto, gesê ’n mens moet besef dat bewaringslandbou oor ’n kontinuum van verminderde tot absolute geenbewerking strek en dat die geskikste soort bewerking vir ’n spesifieke gebied van streek tot streek verskil.
Daarby speel kapitaaluitgawes en die aanpassing van jou ander boerderypraktyke by geenbewerking ook ’n rol. “Sodra jy die eerste klein tree in daardie rigting gegee het, kan jy weet jy is op die regte pad. Gelukkig het ons leierboere in bepaalde gebiede wat reeds die skoolgeld namens ander boere betaal het,” het Smit gesê.
Lang termyn
Dr. Dirk Strydom, bestuurder van bedryfsdienste by Graan SA, het bygevoeg dat omskakeling na bewaringslandbou en geenbewerking ’n langtermynbenadering verg. “Maar met die nuwe soort praktyke wat boere nou al hoe meer begin toets, sien ons die voordele tree ook al hoe vinniger in. En die kosteknyptang oortuig boere al hoe meer,” het hy gesê.
Mnr. Jaco Beyers, verkoopsbestuurder vir Afrika suid van die Sahara by die trekker-en-werktuigmaatskappy John Deere, het gesê hulle ondervind dat strookbewerking ook, benewens geenbewerking, in sekere gebiede goeie groei toon.
Soja-trajek
Die paneel was dit eens dat sojaboonproduksie steeds verder gaan styg. Dié gewas, waarvan Suid-Afrikaanse boere in die afgelope paar jaar keer op keer ’n nuwe nasionale rekord-oes opgelewer het, is ’n ideale wisselbougewas vir talle somersaaiboere.
Wisselbou met minstens drie gewasse is een van die pilare wat internasionaal vir ’n bewaringslandboustelsel voorgeskryf word. Mnr. Martin van Zyl, hoof van die landboumaatskappy Senwes se afdeling vir vernuwing en geintegreerde oplossings, het gesê sojaboonopbrengste in hul gebied het in die afgelope paar jaar verdriedubbel.
“Vanjaar is dit maklik meer as 3 ton per hektaar. Ons voorsien beslis ’n groter beweging na sojabone.”
