Die diversifisering van boerderye in Afrika moet bevorder word vir voedselsekerheid, sê die WorldWatch Instituut.
Luidens ’n berig op News24.com sê die instituut in sy verslag vanjaar, State of the World, baie voorbeelde van innovering het die potensiaal om die voedselkrisis in arm lande op te los.
“Ons het ná ons twee jaar lange projek om honger en armoede uit te wis ’n boek bekend gestel wat ’n padkaart vir donateurs is. Maar daar is geen magic bullet nie," sê me. Danielle Nierenberg, ’n senior navorser van die insitituut.
Sy het 15 maande in Afrika deurgebring en meer as 300 projekte in 25 lande geëvalueer. Teen GMO’s Nierenberg is nie ten gunste van geneties gemodifiseerde produkte (GMO’s) as ’n oplossing vir voedselsekerheid en verhoogde produksie nie.
“GMO’s werk nie vir kleinboere nie. Dit is net volhoubaar vir grootskaalse, mono-kulturele kommersiële boere. Daar is vir Afrika-boere te veel risiko betrokke. Wat meer is, is dat die opbrengste vergelykbaar is met dié van konvensionele landbou. Die bedryf bly dus vir ons vertel dat GMO’s beter is, maar hulle lewer dieselfde opbrengs,” aldus Nierenberg.
Nierenberg sê as boere hul boerderye diversifiseer, kan hulle prysskokke beter hanteer. Die instituut sê baie van die probleme wat arm lande tans ondervind, kan gelê word voor die deur van ryk lande, wat met behulp van skenkings of lenings slegs “winkelvenster hulp” aan arm lande verleen.
Bron: News24.com
19 April 2011
