Malan het op ’n boeredag van mnre. Leonard en Rodney Neuman van Vrede gesê boere het groot geskrik toe slenkdalkoors onlangs epidemiese afmetings aangeneem het, maar hulle ent reeds weer minder.
Die siekte gaan hulle weer tref, asook Wesselsbron-, knopvel- en drie-daestywe- siekte. Hulle moet ook op die uitkyk wees vir Johne se siekte en brandsiekte. Rooiwater neem ook tans toe. Malan het boere aangemoedig om hul vee gereeld in te ent en te dip.
“Moenie oor die prys van veemiddels kla nie, want dit is baie goedkoper as ’n bees of skaap wat vrek. Boere kla ook oor die doeltreffendheid van entstowwe, maar hulle moet eers seker maak hulle gebruik en bêre die middels op die regte manier om maksimum doeltreffendheid te verseker,” het hy gesê. Inheemse parasiete is deel van die skepping en kan nie uitgeroei word nie. “Pas eerder by die natuur aan.”
Druk lei tot siektes
Boere hok vee in hokkies en kampies in waar hulle aan druk en stres onderwerp word. Dan neem siektes toe. Boerdery met skaars wild is ’n voorbeeld, want sulke diere vrek gou van onder meer siektes wat deur bosluise oorgedra word.
Skape op aangeplante weiding en vee in ’n voerkraal is aan net soveel druk onderworpe. “As ’n mens intensief boer, is dit jou lot dat dieresiektes jou vee gaan afmaai, ” sê Malan.
Sommige siektes word van elders na ’n plaas oorgedra. Dus is dit belangrik om hekke toe te hou, vreemde diere eers in kwarantyn te plaas en vreemdelinge weg te hou, want hulle kan siektes aan hul skoene en voertuie aandra.
