Terwyl die Noordwes-regering beoog om donkievleis en -velle na China uit te voer, gaan wêreldwyd al hoe meer stemme teen dié bedryf op weens die wrede behandeling van dié diere.
Luidens ’n verslag van die Britse organisasie The Donkey Sanctuary word donkies dikwels lewend afgeslag en wreed behandel om in China se behoefte aan donkievel en -vleis te voorsien. Donkievel word verwerk tot 'n produk genaamd eijiao, wat in China as 'n gesondheidsproduk gebruik word. Talle Chinese glo eijiao sal hul lewe verleng, hul libido verbeter en skoonheid bevorder.
Tans word tot 1,8 miljoen donkies per jaar geslag om in dié behoeftes te voorsien.
Die aantal donkies in China het afgeneem van 11 miljoen in 1990 tot 6 miljoen in 2014. Dít, gekoppel aan vrugbaarheidsprobleme by donkies, lei daartoe dat China na lande in Afrika, Asië en Suid-Amerika kyk om in sy behoeftes te voorsien.
Uitvoer verbied
Pakistan, Niger, Burkina Faso, Mali en Senegal het egter die uitvoer van donkies verbied, terwyl Egipte ’n stokkie gesteek het voor die uitvoer van sowat 10 000 lewende donkies na China.
In ’n voorval verlede jaar in Bloemfontein is 70 maer en siek donkies weke lank sonder kos gelos. Die eienaar het aan die Dierebeskermingsvereniging (DBV) gesê het hy stel slegs belang in die diere se velle om dit na China uit te voer.
Die verslag dui aan dat dié gebruik in Suid-Afrika voorkom omdat die kondisie van die donkie nie saak maak solank die vel bruikbaar is nie.
The Donkey Sanctuary het ander lande versoek om die slag en uitvoer van donkies vir hul vel te verbied, met die DBV wat sy steun van dié veldtog toegesê het.
