Pogings van Vierfontein se boerevereniging om deur gesprekke met die polisie en landdroste te probeer voorkom dat koperdiewe wat betrap word, nie weens leemtes in die polisie-ondersoeke bloot deur die howe vrygelaat word nie, haak opnuut vas deurdat die dossiere wat ter sprake is verdwyn het.
Boere langs die Vaalrivier by Orkney, Vierfontein en Viljoenskroon ly miljoene rande se skade weens koperdiefstal by hul pompstasies. Om die misdaad te help bestry is ’n reaksiemag onder die boere op die been gebring. In drie afsonderlike gevalle is tien verdagtes einde verlede jaar op heter daad betrap en aan die polisie oorhandig. Hulle is egter vrygelaat omdat daar volgens die landdros soveel foute en leemtes in die verklarings was dat daar geen gronde was om die verdagtes aan te hou nie.
Mnr. David Britz, voorsitter van Vierfontein se boerevereniging, het die saak probeer beredder deur ’n vergadering tussen boere, die landdros en die polisie te reël. Die vergadering is sowat vier weke gelede onder leiding van genl.maj. Moses Makubo, distrikskommissaris, gehou. Hy het opdrag gegee dat die dossiere bestudeer moet word om te bepaal wat die leemtes is en dan sou daar terugvoer aan die boerevereniging verskaf word.
