Pleks van die tradisionele vrolike trant wat Lentedag gewoonlik inneem, gaan renosterliefhebbers dié jaar op 1 September in somber swart klere deurbring.
Die Aquila-wildreservaat by Touwsrivier het op sy Facebook-blad ’n beroep op sy lede gedoen om more (1 September 2011) swart te dra en ’n swart lint om die kantspieëltjie van hul voertuie te bind.
Hiermee word protes aangeteken teen wildstropers se oënskynlike oorlog teen Suid-Afrika se renosterkudde. Die inisiatief volg glo op ’n voorstel van ’n vrou wat die reservaat gekontak het.
Twee witrenosters is die afgelope maand in die wildreservaat deur stropers afgemaai.
Opinies
Op Landbouweekblad se Facebook-blad het lesers gedebateer oor die verskil wat dié inisiatief sal maak in die stryd teen renosterstropery.
“1 September is Lentedag en tradisioneel dra ’n mens wit klere. Swart klere gaan boggerol uitrig aan die gierige skelms,” meen mnr. Harry Louw.
Charlotte Michele Minnie meen egter die saak is die moeite werd om te ondersteun. “Dis vir ’n goeie doel en daar is so min renosters oor. Dis nie ons reg om ons diere te beskerm nie, dis ons voorreg. Ek wens net die mense wat so stroop en moor wil ophou, maar ook gesê, dit sê baie van wie en wat hulle is,” sê sy.
Robby de Beer stem egter nie saam nie. “Ek verstaan dat dit mense meer bewus sal maak van die probleem. Maar wat gaan ’n strik van enige kleur doen om die volgende renoster se lewe te red. Die probleem lê nie by strikkies en goed nie.
“Hoeveel stropers is al gevang? Die regsproses laat almal in die steek, behalwe die stropers. Terwyl die Regering steel en omkoopgeld van stropers aanvaar, sal dinge nooit verander nie. Die Regering voel vir jou plaas en diere niks, hulle kry inkomste uit die stropery, hulle gaan ons nie help nie. Ek sal my strik aan my kar vasmaak, maar ons mors ons tyd.”
31 Augustus 2011
