Die saak sou vandag en môre in die Wes-Kaapse hooggeregshof aangehoor word.
Luidens ’n verklaring kon die hofsaak nie voortgaan nie omdat die regering sy verklarings laat ingedien het en meer as 1 000 bladsye uit die Suid-Afrikaanse Brouery (SAB) se hofsaak oor die drankverbod by Vinpro se saak wil insluit. Dit kon nie hanteer word binne die beperkte tyd wat vir Vinpro se hofsaak beskikbaar gestel is nie.
“Ons is uiters teleurgesteld deur die uitstel van die hofsaak. Die laat indiening en insluiting van bykomende beëdigde verklarings wat nie verband hou met die kern van Vinpro se regsgeding nie, het noodgedwonge tot die uitstel gelei,” sê mnr. Rico Basson, bestuurshoof van Vinpro.
“Omdat die saak uitgestel word, moes nuwe beskikbare datums gevind word vir die regspanne en regters wat aan die saak toegewys is. Die regering word deur drie spanne advokate verteenwoordig en ’n vroeëre datum wat vir al die advokate geskik is, kon nie gevind word nie.
“Vinpro het uit die staanspoor beswaar gemaak teen die groot aantal advokate wat die regering verteenwoordig. Dit is inderdaad ironies dat die regering vir soveel regsverteenwoordigers betaal terwyl hy in die hofstukke sê hy beskik nie oor genoeg hulpbronne om inperkingsmaatreëls meer doelgerig toe te pas nie, soos om padversperrings te beman en ’n verbod op verkope slegs in brandpuntgebiede in te stel.”
Vinpro voer in die hofsaak onder meer aan die verkeerde regeringsvlak (nasionale teenoor provinsiaal) het tot dusver besluitneming rondom die kleinhandelverkope van drank gedurende die ramptoestand behartig en dat die instel van meer as een landwye drankverbod “oormatig, onnodig, ongeregverdig en inderdaad teenproduktief was”.
“Die regering voer veral aan dat hy die Wes-Kaap of ander provinsies nie van ’n toekomstige drankverbod kan vrystel nie – selfs al is daar meer as genoeg beskikbare hospitaalbeddens – omdat die regering nie oor die hulpbronne beskik om padversperrings op te stel om te voorkom dat drank na ander provinsies vervoer word nie,” sê Basson.
Vinpro se regspan sal die bykomende tyd gebruik om sy reagerende verklarings af te handel en sy argument voor te berei. Daar is ook met die regsverteenwoordigers vir die regering ooreengekom dat onverwante en irrelevante dele van die SAB-dokumente wat die regering geprobeer het om ter verwysing in te sluit, by Vinpro se hofsaak uitgesluit sal word.
Nog ’n drankverbod?
Volgens Basson sal Vinpro sy reg uitoefen om dringende tussentydse regshulp van die Kaapse hooggeregshof te versoek indien ’n verdere drankverbod voor die hofdatum ingestel word. Hy sal ook versoek dat toestemming aan die Wes-Kaapse premier verleen word om van nasionale regulasies af te wyk en die verkoop van drank vir binne- en buiteverbruik in die provinsie toe te laat. “Uiteindelik sal soortgelyke verligting ten opsigte van ander provinsies versoek word.”
Basson sê die plaaslike wynbedryf gaan steeds onder ernstige finansiële druk gebuk weens die afgelope jaar se drankverbod en verskeie ander struikelblokke, soos hoë voorraadvlakke en logistieke probleme by hawens wat uitvoer belemmer, terwyl hy stygende insetkoste moet oorkom. “Heelparty ondernemings moes sluit, wat tot werkverliese gelei en ernstige nagevolge ingehou het vir die hardwerkende mans en vroue wat vir hul lewensbestaan van die bedryf afhanklik is.”
