“Ek kyk na die 23ste November aan die begin van elke jaar. Dié dag is die reën-verjaarsdag van Suid-Afrika en vir solank as wat rekords gehou word, is dít die dag waarop die meeste reën val. As daar nie goeie reën in die somerreëngebied voorspel word vir dié datum nie, dan is daar reeds vir my ’n teken van moeilikheid. Dit wás die geval hierdie jaar,” verduidelik die weerprofeet, prof. Peet Pienaar.
In Hilton, KwaZulu-Natal, het die hemele oopgebars op Maandagaand, 29 September. Die lafenis was egter van korte duur – Dinsdagoggend was die lug weer blou. “Vir besproeiingsboere raak die droë lente ’n bekommernis omdat damme begin leeg loop en omdat koring nou baie vog benodig.” Só sê mnr. Ralf Küsel, ’n graan- en beesboer in die noorde van KZN en ook Graan SA se verteenwoordiger vir KwaZulu-Natal.
As Pienaar se gevoel in die kol is, beloof die res van die somer niks beter vir die noorde van die land nie. “Die natuur se ritme is totaal deurmekaar. Die reëns wat nou aan die einde van September geval het, is verkeerd – dit is twee weke té vroeg,” verduidelik prof. Pienaar.
Küsel sê die reën van 29 September was maar haak-en-tak en metings van 5mm tot 40mm is gelyktydig uit dieselfde produksie-areas vermeld. Prof. Pienaar meen hierdie neiging kan die hele somer duur en hy verwag ondergemiddelde reënval. “My voorspelling dui op reën van 8 tot 10 Oktober en weer van 3 tot 7 November reg oor die land. Nóg ’n teken van die skommeling in die weer is as somerreëns in die Kaap val, dan is die reën in die noorde nooit goed nie.”
“Ek voorspel ondergemiddelde reënval hierdie somer. Boere in die noorde gaan moeilik plant, want die reën gaan nie in die tweede week van November kom nie, maar die eerste week van November. Hierdie reën gaan ook nie watwonders wees nie. Daarna kan goeie reën aan die einde van November val en dan eers weer einde Desember,” verduidelik Pienaar. Hierdie verskynsel, meen hy, is eens met die El Niño wat deur ander kenners voorspel word.
“Ons het hierdie winter minder sneeu as normaal gehad en die sardyne het ook 'n draai aan die KZN se Ssuidkus ’n draai gemaak nie,” verduidelik Pienaar. Volgens hom is dit alles tekens van die ritme van die natuur wat nie normaal is nie. “Die enigste goeie teken was die goeie winter wat die Rûens beleef het. As daar sulke teenstrydige tekens is, dan maak ’n mens maar jou afleiding van die oorheersende en meerderheid tekens. Hieruit lui ek af dat ons op ’n droër somer afstuur,” verduidelik hy.
