Die erge droogte oor die hele produksiegebied tesame met die insinking in sybokhaarpryse het die prys van Angoraramme op die amptelike veilings sleg geraak.
Mnr. Petrie Maré, bestuurder van die Angoraramtelersgenootskap, sê op die veilings wat op 20 Januarie op Jansenville en 26 Januarie op Graaff-Reinet gehou is, het die prys van kudderamme gemiddeld met R2 000 stuk teruggesak tot R4 750. Stoetramme wat tussen R20 000 en R25 000 behaal het, was nagenoeg R10 000 goedkoper as ’n jaar gelede. Uitgesoekte kudderamme het teen gemiddeld R8 000 verkoop wat nagenoeg R3 000 minder was.
Maré sê die droogte en onsekerheid oor die rigting van die bokhaarmark wat eers op 14 Februarie hervat, groot druk op pryse vir aanteelmateriaal plaas. “Sou dit goed reën en die mark kop optel kan sake later vanjaar verbeter.”
