Dié afname sal weer die sosiaal-ekonomiese welvaart van gemeenskappe in die wynbedryf beïnvloed.
“Die Olifantsrivierstreek gaan waarskynlik die ergste daardeur geraak word,” sê mnr Rico Basson, besturende direkteur van VinPro.
Dit is uiters belangrik om bewus te raak van die sosiaal-ekonomiese impak van die droogte. Volgens VinPro ondersteun die wynbedryf nagenoeg 290 000 werkgeleenthede. Ondanks verskeie struikelblokke bly boere optimisties oor strukturele veranderinge vanjaar.
Die geleenthede wat gebied word, sluit in groei in die plaaslike en uitvoermark, nouer samewerking en selfs samesmeltings op besigheidsvlak, asook verdere belegging in geleenthede, soos wyntoerisme.
Waterbeperkings
Van 12 Desember 2017 sou landboubesighede in die Breede-Gouritz- en Berg-Olifants- waterbestuursgebiede slegs 40% van hul normale watertoedeling ontvang. Die Olifantsrivierstreek alleen kry minder as 25% van sy normale toedeling van water.
Volgens VinPro bied die hoër waterbeperkings vanaf 1 Januarie 2018 ’n groot probleem, wat wyndruifboere noop om die water tot hul beskikking nóg doeltreffender te gebruik.
Minder water is gelykstaande aan ’n kleiner wyndruif-oes en uiteindelik ’n laer inkomste. “Laer inkomste, tesame met stygings in produksiekoste oor die afgelope jare wat bo inflasie is, sal groter finansiële druk op die landbousektor plaas,” sê Basson.
Kort- en langtermynplanne
Die droogte beklemtoon ’n dringende behoefte aan die opgradering van daminfrastruktuur, soos die Clanwilliam-dam en -kanaalstelsel, asook die uitbreiding van damme se opbergvermoë.
Intussen word kort- en mediumtermynplanne vir droogtebestuur opgestel om juis moontlikhede te ontwikkel waar die finansiële implikasies van die situasie ontstaan.
VinPro-verteenwoordigers neem deel aan verskeie gesprekke oor doeltreffende droogtebestuur, met die uiteindelike doel om doeltreffende kommunikasiestrategieë daaroor in die Wes-Kaapse landboubedryf te handhaaf.
