Volgens FNB se jongste weeklikse landboumarkverslag het die prys van uie verlede week met 128,4% gestyg, vergeleke met dieselfde periode verlede jaar. Die gemiddelde prys van R5,73 per kilogram uie was 1,7% hoër as twee weke gelede se pryse.
Mnr. Paul Makube, senior landbou-ekonoom by FNB, sê verlede week se aanbod van uie het op ’n weekgrondslag met 11,8% gedaal, vergeleke met twee weke gelede. Verlede week se gemiddelde verkope van 6,46 ton is wel 2,2% hoër, vergeleke met verkope tydens dieselfde periode verlede jaar. “Die versterking van uie se pryse kan op die medium termyn voortduur weens die verlaging in voorraad, wat ’n gevolg is van die droogte in die Kaapprovinsies,” sê Makube.
Die prys van tamaties het verlede week skerp gestyg weens ’n aansienlike daling in aanbod. Volgens Makube het tamatiepryse met 34,3% tot R7,89 per kg gestyg. Dié prys is egter 4,6% laer as in die ooreenstemmende tydperk verlede jaar.
Sowat 3,3 ton tamaties is verlede week verkoop, wat 26,4% meer is as die hoeveelheid wat twee weke gelede verkoop is. Makube verwag dat tamatiepryse in komende weke sal begin daal namate voorraad aangevul word.
Ceres plant 50% minder aartappels
Intussen het die prys van aartappels ook verlede week gestyg. Die prys van R4,12 per kg was 2,5% hoër as die aartappelprys van twee weke gelede, terwyl dit 7,4% hoër is as die prys vir die ooreenstemmende tydperk verlede jaar.
Die sowat 15 ton aartappels wat verlede week verkoop is, is 12,9% laer as twee weke gelede se verkope, hoewel dit 4,2% hoër is as die aantal tonne wat in die ooreenstemmende tydperk verlede jaar verkoop is.
Mnr. Dawie Maree, die hoof van landbou en bemarking by FNB Landbou, sê varsproduktemarkte – en dus verbruikers – moet in die komende maande verdere stygings in varsprodukpryse verwag. Dit is veral weens die effek van die droogte wat tans nog nie ten volle bepaal kan word nie. “In die omgewing van Ceres is byvoorbeeld 50% minder aartappels aangeplant en in die Sandveld is die aartappel-aanplantings aansienlik minder weens die droogte.”
Volgens Makube het pryse vir vrugte ook gestyg weens ’n aansienlike daling in voorraad.
Maree sê onsekerheid bestaan oor of die noordelike dele van Suid-Afrika, wat ook vars produkte verbou, die afname in voorraad sal kan aanvul wat deur die droogte veroorsaak word. “Daar gaan dalk nog ’n hele paar (prys)verrassings kom,” sê Maree.
