Die produksie van rooibos kan erg ingekort word weens die droogte, en dit kan tot prysverhogings van tot 90% lei, luidens ‘n nuusverklaring van die SA Rooibosraad.
Rooibosprodusente in die Sederberge, Bokkeveld en andere streke in die Wes- en Noord-Kaap het min of geen reën in die belangrike maande van Julie en Augustus ontvang.
Mnr. Ernest du Toit, segsman van die SA Rooibosraad, sê die oes van 2016 kan die swakste in jare wees.
"Hoewel dit moeilik is om die ware impak van die droogte in hierdie stadium te evalueer, verwag ons dat dit beduidend kan wees. Ons kan uitset-verliese slegs van Januarie tot Mei volgende jaar kwantifiseer, wanneer die finale oes bekend is. Verlede jaar se oes het 11 000 ton beloop, met 'n totale verbruik by 15 000 ton.”
Du Toit sê die verwagte swak oes kan ook 'n ongunstige impak hê op plaaswerkers en die gemeenskappe wat op dié bedryf staat maak.
