Koopbriewe vir droogtehulp sal uitgereik word aan boere in die suide van die Wes-Kaap – vanaf Heidelberg tot Mosselbaai, het mnr. Gerrit van Rensburg, Wes- Kaapse minister van landbou en landelike ontwikkeling, aangekondig.
Hoewel dit wel in dele van die Wes-Kaap gereën het, is die gebied suid van die Outeniquaberge steeds baie droog en het boere dringend bystand nodig om hul kuddes te onderhou.
Na raming sal ongeveer 700 boere in die gebied in aanmerking kom vir hulp. Saam met die 400 boere in die Klein-Karoo en 300 in die Sentraal-Karoo en van Touwsrivier sal sowat 1 400 boere hulp kry.
Van Rensburg sê daar is nog R46 miljoen vir droogtehulp in die distriksmunisipaliteit Eden beskikbaar. Die koopbriewe word met dié geld uitbetaal.
Boere sal teen R480 per grootvee-eenheid − tot ’n maksimum van 30 eenhede per boer – vergoed word. ’n Eie bydrae van 10% tot 30% sal van die boere vereis word na gelang van die getal vee wat hulle besit.
Koopbriewe sal vanaf 15 Mei uitgereik word en geldig wees tot einde Junie. Van Rensburg versoek boere om so gou moontlik seker te maak dat hul besonderhede reg op die aansoekvorms ingevul is.
Inligting wat soms nie gemeld word nie, maar wat nodig is, is registrasienommers vir belasting, korrekte eiendomsbeskrywing volgens transportaktes en die mees onlangse veegetal-register.
Boere kan mnr. Wim Filmalter van die Wes-Kaapse departement van landbou (Riversdal) bel by tel. 028 713 2442 of mnr. Dawie de Villiers van die navorsingsplaas Outeniqua op George by tel. 044 874 2047 om die inligting op hul aansoekvorms te bevestig en ontbrekende inligting te verskaf.
5 Mei 2011
