Bykans 80% van die geld wat die Nasionale Tesourie bewillig het om droogtehulp aan boere toe te staan, is bestee.
Volgens die Departement van Landbou, Bosbou en Visserye is net meer as R164 miljoen van die bewilligde R212 miljoen vir die aankoop van voer vir diere in vier droogtegeteisterde provinsies al bestee. (Wes-Kaap, Oos-Kaap, Mpumalanga en Noord-Kaap.) Die tesourie het dié geld vir die 2016/’17 geldjaar bewillig.
Me. Makenosi Maroo, hoofdirekteur vir kommunikasie by die departement, het gesê die departement maak vordering met sy droogteverligtingsprogram en dat sy ingrypings vir die lewering van veevoer in die Oos-Kaap, Wes-Kaap en Mpumalanga voltooi is.
Meer as 450 000 sakke voerkorrels
“Meer as 454 222 sakke voerkorrels en 4 204 ton lusern is aan verskeie provinsies gelewer en word aan die boere versprei.”
Dr. Pieter Prinsloo, ondervoorsitter van die RPO, het bevestig dat kommunale boere in die Oos-Kaap wel veevoer gekry het, maar geen kommersiële boere nie.
Veevoer vir die Noord-Kaap is onlangs in Kenhardt afgelewer en boere word gevra om hulle voer by die verspreidingspunte te gaan haal wanneer distrikbestuurders so versoek. Slegs boere wat vir droogtehulp geregistreer is, sal voer ontvang.
Veevoer vir diere
Behalwe vir die geld van die tesourie, het provinsies R198 miljoen van hulle provinsiale toelaag afgeknyp om veevoer en water aan hulle diere te verskaf.
Mnr. Mike Mlengana, direkteur-generaal van die Departement van Landbou, Bosbou en Visserye, het gesê die aflewering en verspreiding van voer is byna in die geraakte provinsies voltooi.
Mnr. Aggrey Mahanjana, sekretaris-generaal van die African Farmers' Association of South Africa (Afasa), het ook bevestig dat veevoer aan die Oos-Kaap en Mpumalanga gelewer is.
