Vlak 4-beurtkrag sal môre van 05:00 tot 16:00 ingestel word, gevolg deur vlak 5-beurtkrag van 16:00 tot 05:00 op Woensdag 18 Januarie.
Eskom waarsku egter dat ’n hoë vlak van onsekerheid steeds met beurtkrag gepaardgaan en bogenoemde aanpassings sal slegs moontlik wees indien die eenhede weer aanlyn is. Daar kan dus op kort kennisgewing weer veranderings aan die beurtkragvlak wees as gevolg van die “inherente onbetroubaarheid” van die steenkoolkragstasies.
Luidens die verklaring het Eskom op 6 Januarie nóg 50 miljoen liter diesel aangekoop. Hierdie brandstof sal egter spaarsaam gebruik word om opgaardamme se vlakke te bestuur en beurtkrag deur die loop van die dag te beperk. Die noodopwekkingseenhede dra tans 5 700 MW tot die netwerk by.
Opwekkingseenhede het vandag weer by die Kendal-, Majuba- en Tutuka-kragstasies aanlyn gekom. Die onderhoudsprogramme, wat gedurende die somer sal voortduur en gedurende die winter verminder word, sal volgens Eskom help om kapasiteit te vergroot. Daar word tans onderhoudswerk aan 12 opwekkingseenhede gedoen, wat ’n opwekkingskapasiteit van 5 804 MW verteenwoordig.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
