Hy, mnr. Omri van Zyl, Agri SA se hoofbestuurder, en me. Annelize Crosby, die organisasie se hoof van grondsake, was onlangs op ’n algemene vergadering op Bloekomspruit in Gauteng aan die woord om boere se vrae oor Agri SA se standpunte oor die grondkwessie te beantwoord.
“Myns insiens was die landbou beter daaraan toe toe ons boereverenigingvergaderings kon hou om vrae regstreeks te beantwoord. Uiteindelik is dit tog hulle wat die belangrikste organisasies is – die boere op grondvlak,” het Kriek gesê.
Hy het benadruk daar word nie oor enige boer se eiendomsreg onderhandel nie. “Wat ons wel doen, is om ons sterk teen die verandering van artikel 25 van die Grondwet te posisioneer,” sê hy.
G’n sag
Kriek was ook hoogs krities oor die mening dat Agri SA te sag is.
“Die indruk is dat diegene wat oor die saak wil debatteer, te sag is en dat hakke inkap die enigste oplossing kan wees. Die waarheid is dat die georganiseerde landbou balans moet hê. Jou enigste stuk gereedskap kan beslis nie net ’n hamer wees nie. Jy moet alles kan doen – van baklei tot saam om die tafel sit. As jy dit nie kan doen nie, kan jy nie aan die debat deelneem nie.”
Hy het boere die versekering gegee dat alles wat Agri SA in die gronddebat doen, in ooreenstemming met die Grondwet is, daarop gerig is om grondregte te beskerm en ekonomies sin maak.
Op sy beurt het Van Zyl gesê Agri SA beïnvloed regeringsbeleid deur met tasbare oplossings vir die landbou vorendag te kom.
“Uiteindelik is dit die boere wat bepaal hoe ons die saak vorentoe neem. In my hart weet ek dat Suider-Afrika se voortbestaan van die boere van Suid-Afrika afhang.”
Van Zyl het gesê die georganiseerde landbou kan dit nie meer bekostig om verdeeld te wees nie. “Die impak wat ons gaan hê, gaan minimaal wees indien ons verdeeld is.”
Fonds
Agri SA het ook ’n fonds gestig om hofsake aanhangig te kan maak en senior advokate aan te stel, terwyl ’n maatskappy aangestel is om die politieke bewegings in die land te monitor. “Kriek is ook tot die presidensiele advieskomitee verkies. Ons gee dus die president regstreeks raad oor die huidige landbousituasie.
Van Zyl het gesê die klem kan nie net op die hier en nou wees nie, maar ook op die volgende geslag mense wat in die landbou gaan staan.
“Ons sal verantwoordelike en slim besluite moet begin neem om seker te maak boere bly in produksie en help die volgende generasie en die generasie ná hulle om volhoubaar te leef.”
Kriek het gesê die tyd dat die landbou in ’n wit of swart konteks gesien word, is lankal verby.
“As ons sê ons moet saamstaan tot die landbou se beswil, dan moet ons die breër konteks insien. Jóú probleem en die swart boer se probleem stem op baie plekke ooreen.”
Aanspreeklikheid
Hy meen ook die regering moet aanspreeklik gehou word aan die Grondwet en ander landswette. “Dit gaan oor die balans van hoe dinge gedoen word. Ons gaan die regering aanspreeklik hou en ons gaan ons plek om die debatstafel inneem. Ek sal nie toelaat dat daar van regeringskant af besluite geneem word waaraan ons nie deelneem nie,” het Kriek gesê.
“As ons dink ons as wit boere gaan alleen dinge in Suid-Afrika verander, maak ons ’n baie groot fout. Ons sal as wit, swart, bruin en Indiërboere almal moet saamstaan. In die grondkwessie kan ons nie bekostig om nié saam te staan nie.”Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op Whatsapp om daaglikse landbounuus op jou selfoon te ontvang.
