Die bevolking van Tokelau, ’n klein eiland tussen Nieu-Seeland en Hawai, word in 2012 die eerste om in geheel oor te skakel na die benutting van sonenergie.
Die eilandgroep van 12 vk. km en ’n inwonertal van 1 500 is waarskynlik ook een van die eerste eilande wat weens klimaatsverandering onder die see-oppervlak gaan verdwyn.
Mnr. Faipule Foua Toloa, staatshoof van Tokelau, is een van die afgevaardigdes op die klimaatberaad in Durban. Hy sê al weet hulle dat hul eiland vernietig gaan word weens ’n styging in die seeoppervlak, kan hulle nie net stilsit nie. “Ons wil die wêreld wys dat ons ons verantwoordelikheid nakom om aardverwarming teen te werk al voer ons ’n oorlewingstryd.”
Slegs son-energie in Julie 2012
Waar diesel voorheen vir kragopwekking gebruik is, is daar nou ’n lening by Nieu-Seeland aangegaan om sonpanele te installeer. Teen Julie volgende jaar sal die mense hoofsaaklik son-energie benut.
Die landbou op die eiland bestaan hoofsaaklik uit die verbouing van piesangs, kokosneute en ’n paar ander neutsoorte. Van die inwoners hou ook varke en hoenders aan, maar vis is die stapelvoedsel.
Toloa sê daar moes ’n verbod op die invoer van kunsmis en chemikalieë geplaas word omdat dit in die see uitloog en hul visbronne bedreig. Uiterste weer wat deesdae voorkom, vernietig ook die koraalriwwe en die vis om die eilande word al hoe minder.
1 Desember 2011
