Die Franschhoekse landgoed La Motte is die wynplaas met die beste omgewings- en mensvriendelike boerderypraktyke, aldus die beoordelaars van die agtste Nedbank Groen Wyn-kompetisie.
Die plaas is ook as ’n leier in die ontwikkeling van die gemeenskap aangewys. Anders as by ander wynkompetisies het die beoordelaars nie net die produk in die bottel in ag geneem nie, maar ook die welstand van die plaaswerkers en hul omliggende gemeenskappe, asook die invloed wat die boerdery op die omgewing het.
Mnr. Duimpie Bayly, een van die beoordelaars en voorsitter van die Biodiversiteit-en-wyninisiatief, het op die prysuitdeling op Stellenbosch gesê die gehalte van die organiese en omgewingsvriendelike wyn wat vir die kompetisie ingeskryf is, het die afgelope paar jaar aansienlik verbeter.
“Dit is omdat die wingerde verbeter het. ’n Wynmaker is nie ’n towenaar nie – hy of sy kan nie toor met swak druiwe nie. Dit is goed om die vooruitgang te sien. Dit is ook ongelooflik om te sien hoe plase aanpas by klimaatsverandering en gereed maak vir die toekoms.”
Hoofstroom
Lourensford is aangewys as die leier in energiebewaring, terwyl Paul Cluver die leier in waterbewaring is. Bartinney lei op die gebied van ekotoerisme. Altesaam 120 wyne is in twee kategorieë, naamlik organise wyn en geïntegreerde wynproduksie, beoordeel.
Me. Fiona McDonald, leier van die beoordelaarspaneel, sê die graderingsagentskap Moody’s het Suid-Afrika in September vanjaar as die snelgroeiendste groen ekonomie in die wêreld aangewys. “Enigiets groen, organies, omgewings- of ekovriendelik het hoofstroom geraak.”
Verbruikers is deesdae ook inskikliker om ’n premieprys te betaal vir meer omgewingsvriendelike produkte. Sy sê die natuurlike en organiese wyne se sulfaatprofiele verbeter en dit toon meer vrugsuiwerheid. “Moenie apologeties daaroor wees nie. Bemarking is belangrik, maar gehalte bly egter die sleutel. Mense proe dít wat in hul glas is, maar dan leun hulle altyd weer na gehalte. Die feit dat ’n produk organies is, is net ’n bonus.”
Earthboard Cabernet Sauvignon Organic 2015 is as die beoordelaars se gunstelingrooiwyn, asook as die algehele wenner in die organiese kategorie aangewys. In die kategorie vir geïntegreerde wynproduksie het Paul Cluver se Edellaatoes 2014 die kroon gedra.
