Reënvalwaarskynlikhede vir die res van Desember het verswak vir veral die westelike dele van Suid-Afrika, terwyl kanse steeds goed lyk vir die oostelike dele van die land. Volgens Van den Berg is die moontlikheid van reën skraal vir die Noord-Kaap, die Wes-Vrystaat, die westelike dele van Noordwes, die Oos-Kaap en feitlik die hele Namibië. “Dit lyk ál meer of die westelike mieliesaaigebiede gaan sukkel om betyds geplant te kry.”
“Die tweede groot krisis wat besig is om te ontwikkel, is in die ekstensiewe veegebiede,” sê Van den Berg. Weiding is swak en oor groot gebiede het beskikbare weiding afgebrand. “Rekening moet ook gehou word met die uitwerking van die verwagte El Niño-stelsel, wat tydens die tweede, belangrikste deel van die seisoen kan voorkom. Dis in die lig van die reeds bedenklike weidingstoestande wat bestaan.”
Tropiese siklone en El Niño
’n Positiewe verwikkeling is dat die risiko vir tropiese siklone oor Suider-Afrika kleiner lyk. Van den Berg sê die Indiese Oseaan se see-oppervlaktemperatuur naby die Afrika-kuslyn is tans koeler as normaalweg, veral vanaf die Suidkus tot verby die Mosambiekkanaal. Aan die oostekant van Madagaskar is daar steeds ’n gebied waar see-oppervlaktemperature bogemiddeld is, hoewel dit nader aan die Australiese kus weer laer is. Dié seevlaktemperature hou verband met die ontwikkeling van tropiese siklone.
Volgens Van den Berg is dié koeler temperature goeie nuus, omdat dit die risiko vir tropiese siklone oor Suider-Afrika verswak.
Wat die voorspelde El Niño-stelsel betref, was daar steeds geen koppeling van die Nino-gebiede se warmer see-oppervlaktemperature met klimaatstelsels nie. “Dit laat die hoop opvlam dat nog reën verwag kan word en dat die seisoen tot op hede net laat is,” sê Van den Berg. “Die belangrikste is egter dat dit na ’n hoërisiko-seisoen vir veral die sentrale tot westelike somerreënvalgebied lyk.”
Drie moontlike scenario’s
Van den Berg voorspel drie scenario’s vir die res van die somer:
Scenario 1. Die kans is tans 30% dat swakker as verwagte reënval in Desember en Januarie, asook van Februarie tot April, kan voorkom. Die droë toestande wat vir die laaste deel van die somer voorspel word, is die gevolg van die verwagte El Niño-weerstelsel.
Scenario 2. Die kans is 50% dat goeie reënval in Desember en Januarie kan voorkom, gevolg deur baie droë toestande in die laaste deel van die seisoen weens die voorspelde El Niño-weerstelsel.
Scenario 3. Die kans is 20% dat die El Niño-weerstelsel se reaksie nie tipies is nie, en met goeie reënval deur die res van die seisoen gepaardgaan.
“Dié scenario’s kan minder of meer relevant wees as dit geografies toegepas word. Vir die westelike dele van Suid-Afrika is daar ’n beter kans op scenario 1, veral as dit teen einde Desember nog nie gereën het nie, terwyl daar ’n beter kans op scenario 3 vir die oostelike dele van die land is,” sê Van den Berg.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
