Boer van die Jaar
Vanjaar se nasionale Boer van die Jaar is die ALS Groep wat op sowat 60 000 ha in vier provinsies boer. Die groep is vanjaar reeds aangewys as KwaZulu-Natal se Boer van die Jaar. Die boerdery produseer wit- en geelmielies, sojabone, koring en lusern, en plant ook weiding op 1 000 ha onder besproeiing en 3 500 ha droëlande.
Die groep besit sowat 10 000 stuks vee en wild en verskaf werk aan 780 huisgesinne. Die boerdery besit sy eie silo’s, droeërs en siftingstoerusting.
ALS Agri Noordwes bestaan uit ’n gediversifiseerde boerdery wat met wild, Dohne-Merino- en Meatmaster-skape op 3 500 ha naby Potchefstroom boer. Ekotoerisme is ook hier een van die bedrywe van die boerdery. ALS Agri Noord-Kaap bedryf ’n skaap-, vee- en wildvertakking, asook ’n jagonderneming, bouwerk en die verhuring van grondverskuiwingsmasjinerie.
Die ander finaliste in dié kategorie was mnr. Danie Bester van Mpumalanga, Mockford Farms van Polokwane in Limpopo en mnr. Andrew Masterson van Milagro Farm naby Oesterbaai in die Oos-Kaap.
Landboukundige van die Jaar
Vanjaar se toekenning vir Nasionale Landboukundige van die Jaar het gegaan aan ’n landboukundige as voorligter. Hier is mnr. Pieter Bruwer van Mpumalanga as Landbouskrywers SA Nasionale Landbouvoorligter van die Jaar bekroon.
Bruwer word alom beskou as ’n voorligter met die vermoë om teorie en praktyk in ’n werkbare oplossing vir boere te omskep. Bruwer het vanaf 1989 tot 2012 heeltyds met skape, vleisbeeste, mielies, sojabone, droëbone, koring, blomkool en raaigras geboer.
Hy is in 2016 aangestel as landboukundige by Langfontein Seeds op Wakkerstroom en het sedert sy aanstelling homself bewys as ’n kenner op die gebied van volhoubare landbou. Hy het ’n meestersgraad (cum laude) in volhoubare landbou aan die Universiteit van die Vrystaat verwerf. Bruwer is tans besig met sy doktorsgraad in volhoubare landbou aan dieselfde universiteit.
Die ander finaliste in dié kategorie was mnre Rick Kleyn, ’n konsulterende diere-voedingskundige met ’n wye ervaringsveld in voermeule- en pluimveetoepassings, Martiens du Plessis, die hoof van presisieboerdery by die landboumaatskappy NWK, Dup Haarhoff, ’n landboukundige wat betrokke is by watersake en die hoof van landboukundige dienste by GWK asook Conrad Schutte, ’n wingerdboukundige wat 12 jaar gelede by die wynbedryfsliggaam Vinpro aangesluit het.
Nasionale Toetreder tot Kommersiële Landbou
Die Nasionale Toetreder tot Kommersiële Landbou is mnr. Tshilidzi Matshidzula van die Oos-Kaap.
Hoewel hy oorspronklik van Thohoyandou in Limpopo kom, het mnr. Tshilidzi Matshidzula die bestuur van die melkplaas Little Barnet, sowat 5 km van Alexandria in die Oos-Kaap, in 2005 oorgeneem. Hy is ’n 40%-aandeelhouer in Matshibele (Edms.) Bpk., die eienaar van die plaas waarop sowat 450 koeie gemelk word.
In 2016 het Little Barnet die Mangold-trofee van die Bathurst-bewaringskomitee ontvang en is Matshidzula ook as die Oos-Kaapse Jongboer van die Jaar aangewys. In 2019 het Matshidzula en Oakleaf Agri ’n vennootskap aangegaan ten einde ’n nuwe melkery, Mountain Park, in Stutterheim op te rig. Mountain Park besit meer as 1 000 koeie in melk en vandag besit Matshidzula ’n aandeel van 5% in dié boerdery met die opsie om sy aandeelhouding tot 10% te vergroot.
Hy het in 2020 die Melkprodusente-organisasie (MPO) en Nedbank se Rentmeesterskapstoekenning ontvang en dien in die raad van die Oos-Kaapse Melkprodusente-organisasie en in die komitee van die Alexandria-suiwelstudiegroep. Matshidzula is ook betrokke by die opleiding van landboustudente.
Die ander finaliste in dié kategorie was mnre. Johnny Karolus, die bestuurder van Eyethu Intaba (die Donkerbos-boerdery se bemagtigingsprojek) van die Wes-Kaap en Kobela Mokgohloa van Gauteng, wat komkommers produseer op sy plaas Korema in die Winterveldt-landbouhoewes.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
