Eskom gaan tugmaatreëls neem teen sy werkers wat die beleid oor toegang tot plase oortree.
Boonop kan kontrakteurs wat nie aan die beleid gehoor gee nie, hul kontrakte verloor, het mnr. Arthur John Smith, bestuurder van Eskom se kontaksentrum, op Agri Gauteng se kongres gesê. Die beleid oor toegang tot plase is ná drie jaar deur Eskom goedgekeur.
Die verhouding tussen boere en Eskom ly skade as dit nie nagekom word nie, sê hy. Hy het boere aangemoedig om sulke oortredings onder Eskom se aandag te bring sodat teen skuldiges opgetree kan word.
Kragdiefstal steeds 'n probleem
Hy het grondeienaars ook gemaan oor kragdiefstal en gesê waar groot verskille in normale verbruik opgemerk word, gaan meters geoudit word. Volgens Smith is sindikate regoor die land bedrywig. Eskomwerkers is ook daarby betrokke. “In gebiede waar met toerusting gepeuter is, is tot soveel as 80% van punte betrokke.
Twee werkgroepe tussen Eskom en die landbou het vir samewerking tot stand gekom. Een is die tegniese werkgroep wat serwitute bestuur en toegesien het dat die protokol tot plaastoegang ontwikkel en in werking gestel is.
Die ander is ’n gesamentlike ekonomiese werkgroep wat binnekort in werking tree om na aspekte, soos tariewe, te kyk. Smith sê skakelpersone is vir elke provinsie aangestel om skakeling met die landbou te vergemaklik.
27 September 2011
