Die beskuldigdes in die Estina-bedrogsaak het vandag hul eerste verskyning in die Bloemfontein-hoofgeregshof gehad.
Die saak hou verband met R280 miljoen wat na bewering via die Estina-melkplaas na Gupta-maatskappye herlei is sonder dat die oorspronklike begunstigdes van die projek enige voordeel gekry het.
Landbou.com het voorheen ook berig miljoene rande belastingbetalersgeld wat vir die Estina-projek bewillig is, is in 2013 aangewend vir ’n spandabelrige troue van me. Vega Gupta, ’n susterskind van die omstrede Gupta-broers Atul en Ajay, wat ’n fortuin uit die staatskas betaal is danksy ’n onbehoorlike houvas op oudpres. Jacob Zuma.
Me. Sindiswe Seboka, woordvoerder van die NVG, het kort ná die beskuldigdes se verskyning aan Landbou.com gesê die saak is tot 21 April uitgestel en dat die staat sy saak teen die maatskappy Estina teruggetrek het aangesien dit tans gelikwideer word.
Mnr. Mosebenzi Zwane, oudminister en Vrystaatse LUR vir landbou in die tyd toe die beweerde korrupsie plaasgevind het, mee. Ronica Ragavan en Ugeshnie Govender, voormalige direkteure van ’n aantal Gupta-maatskappye, mnr. Peter Thabethe, voormalige hoof van die Vrystaatse departement van landbou, me. Seipati Dhlamini, voormalige finansiële hoof, mnr. Kamal Vasram, direkteur van die Estina-suiwelprojek, en mnr. Takisi Janki Masiteng, voormalige hoofbestuurder, is die ander beskuldiges.
Zwane word beskuldig van korrupsie en bedrog, terwyl Ragavan en Govender van korrupsie en geldwassery aangekla word. Thabethe, Dlamini, Vasram en Masiteng staan onder meer op aanklagte van diefstal, bedrog en korrupsie tereg.
Die maatskappye wat by die saak betrek word, is Sahara Computers, Aerohaven Trading, Oakbay Investments, Linkway Trading, Islandsite Investments, Westdawn Investments, Mabengela Investments en Confident Concept.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
