Die
aanklagte teen hulle, wat bedrog en geldwassery insluit, spruit uit die
grootskeepse korrupsie met die Estina-melkplaas by Vrede in die Vrystaat.
Die saak hou verband met R228 miljoen wat na bewering via die melkplaas na Gupta-maatskappye herlei is sonder dat die oorspronklike begunstigdes van die projek enige voordeel gekry het. Die Vrystaatse departement van landbou en landelike ontwikkeling het dié lys van begunstigdes as regverdiging gebruik vir die miljoene wat die staat in die projek belê het. Dit het egter net Estina, ’n maatskappy van die Gupta-familie, wat by die projek betrokke was, gebaat.
Mosebenzi Zwane, oudminister en Vrystaatse LUR vir landbou in die tyd toe die beweerde korrupsie plaasgevind het, Ronica Ragavan en Ugeshnie Govender, voormalige direkteure van ’n aantal Gupta-maatskappye, het saam met Peter Thabethe, voormalige hoof van die Vrystaatse departement van landbou, Seipati Dlamini, voormalige finansiële hoof, Kamal Vasram, direkteur van die Estina-suiwelprojek, en Takisi Janki Masiteng, voormalige hoofbestuurder van distriksdienste van die departement van landbou, verskyn.
Volgens Sindisiwe Seboka, woordvoerder van die nasionale vervolgingsgesag (NVG), het landdros Estelle de Lange die verhoor na die hooggeregshof in Bloemfontein oorgeplaas. Hulle sal hul eerste verskyning op 25 Januarie volgende jaar in die hooggeregshof maak. Sy sê die NVG het ook sy klagstaat aan die hof openbaar gemaak.
Zwane word beskuldig van korrupsie en bedrog, terwyl Ragavan en Govender van korrupsie en geldwassery aangekla word. Thabethe, Dlamini, Vasram en Masiteng staan onder meer op aanklagte van diefstal, bedrog en korrupsie tereg. Zwane is tans ’n parlementslid en voorsitter van die parlementêre portefeuljekomitee vir vervoer.
Die Estina-melkplaas was veronderstel om vyf melkkoeie elk aan 100 opkomende boere te verskaf, maar miljoene rande belastingbetalersgeld wat daarvoor bewillig is, is in 2013 aangewend vir ’n spandabelrige troue van me. Vega Gupta, ’n susterskind van die omstrede Gupta-broers Atul en Ajay, wat ’n fortuin uit die staatskas betaal is danksy ’n onbehoorlike houvas op oudpres. Jacob Zuma.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
