Chris Mahlangu, die moordenaar van mnr. Eugene Terre’Blanche, voormalige leier van die Afrikaner Weerstandsbeweging (AWB), se lot sal op 20 Augustus bepaal word. Regter John Horn het Maandag (18 Junie 2012) in die Hooggeregshof op Ventersdorp dié vonnisoplegging uitgestel.
Luidens ’n berig op News24.com sal die man wat saam met Mahlangu vir die moord aangekeer is, Patrick Ndlovu, op dieselfde dag op ’n klag van huisbraak met ’n voorneme om te steel, gevonnis word. Ndlovu is van moord en poging tot roof vrygespreek.
Die twee het hulself aan die polisie oorgegee kort ná Terre’Blanche se liggaam op 3 April 2010 in sy plaashuis gevind is.
Ligte vonnisse
Volgens die berig het ’n groterige aantal belangstellendes buite die hof saamgetrek vir die hofverskyning. Mnr. John Tau, sekretaris van Cosatu in Noordwes, sê die gemeenskap het gemengde gevoelens oor die saak. “Ons hoop vir ligte vonisse.”
Lede van die AWB het ook buite die hof saamgetrek. ’n Sterk polisieteenwoordigheid is buite die hof gehandhaaf.
Bron: News24.com
