’n Afvaardiging van die Europese Unie het die volstruisbedryf besoek om die situasie rondom voëlgriep te bestudeer.
Luidens ’n mediaverklaring het die Suid-Afrikaanse Volstruisbesigheidskamer (SAVBK) met die ondersteuning van die Departement van Landbou, Bosbou en Visserye, die hulp van kenners ingeroep om die situasie te monitor.
Lede van die SAVBK, werknemers van die departement, veeartse, boere en verskeie ander betrokkenes het ’n weeklange werksessie van die EU bygewoon.
Sedert April verlede jaar teister die H5N2-virus die bedryf en is ’n uitvoerverbod op volstruisvleis van krag. Die opheffing van die verbod is onlangs weer vertraag ná ’n uitbreking van die virus op ’n plaas binne die beheersone in die Klein-Karoo-vallei bevestig is.
Intussen verloor die bedryf maandeliks sowat R108 miljoen aan uitvoerinkomste. Lees meer oor die jongste uitbreking hier.
Herstruktuering
Die afvaardiging het die bedryf aangeraai om homself te herstruktureer vir volhoubaarheid. “Die grootste veranderings wat geïmplementeer moet word, is om die beweging van volstruise te beperk en strenger biosekuriteitsmaatreëls op plase in te stel. Die digtheid van volstruisbevolkings in sekere gebiede moet ook verminder word,” lui die verklaring.
Die span kenners het ook gesê die volstruisbedryf moet, met die samewerking van die Regering, ’n betroubare en volhoubare siektebeheerstelsel toepas om verdere uitbrekings van die virus te voorkom. Dít sal ook bydra tot die herinstelling van die bedryf se uitvoerstatus.
Die uitvoerstatus sal met handelsvennote in die EU bespreek word sodra die tekortkominge in die stelsel wat tans gebruik word, geïdentifiseer en reggestel is. “Dit is nie tans duidelik wanneer vleisuitvoer weer sal hervat nie,” sê die departement.
1 Maart 2012
