Landboudebatte moet op feite en nie op propaganda gebaseer word nie, sê dr. Pieter Mulder, die adjunk-minister van Landbou, Bosbou en Visserye. Mulder het dít as een van die sektor se uitdagings vir 2011 gestel tydens ‘n boeredag op Christiana in Noordwes.
“Veralgemenings wat voorgee dat die verhoudings tussen kommersiële boere en hulle werkers sleg is, is totaal verkeerd en op propaganda-aannames gegrond. ’n Wetenskaplike navorsingondersoek wat deur professor Lawrie Schlemmer uitgevoer is, het bevind dat die verhoudings tussen boere en hulle plaaswerkers oorweldigend positief en harmonieus is. Dit is ook my persoonlike ervaring die afgelope twee jaar as adjunkminister waar ek baie plase besoek het,” sê Mulder.
Swak verhoudings
Mulder sê plaasmoorde is nie die gevolg van swak verhoudings tussen kommersiële boere en hulle plaaswerkers nie. “Die ondersoek na plaasaanvalle wat in 2003 gepubliseer is, het 2600 gevalle van plaasmoorde bestudeer.
Slegs 1,6% van hierdie gevalle het met arbeidsgeskille op plase verband gehou. ’n Swak verhouding tussen ’n fabriekseienaar en sy werkers, of ’n kommersiële boer en sy werkers, kan in elk geval nooit ’n moord regverdig nie”.
Me. Tina Joemat-Pettersson, die Minister van Landbou het Donderdag in die parlement gesê dat hulle ondervind dat baie plaasmoorde plaasvind weens swak verhoudings tussen boere en plaaswerkers. Kliek hier om dié berig te lees.
Groenskrif
Mulder het ook boere en georganiseerde landbou aangemoedig om hulle insette oor die groenskrif op grondhervorming asook die beoogde Wet op Verblyfsekerheid te lewer.
“Die feit dat die groenskrif nog nie gepubliseer is nie, dui daarop dat daar steeds gesprekke en debatte agter die skerms plaasvind. Boere en georganiseerde landbou moet aktief elke moontlike geleentheid om insette hieroor te maak, benut,“ sê Mulder.
28 Februarie 2011
