Groot lof is uitgespreek vir boere wat soos een man saamgekom, opgetree en ’n gewapende plaasaanvaller baie vinnig vasgetrek het.
Tom de Wet skryf op Beeld se webwerf dat mnr. Buks Swanepoel (81) en sy vrou, Baby (80), van die plaas Sterkfontein buite Vierfontein, in die Anncron-kliniek in Klerksdorp behandel word ná ’n aanval. Die egpaar is in hul huis oorval. ’n Plaaswerker wat ná ete teruggekom het, het op die aanvallers afgekom en die polisie gebel toe hulle weghardloop.
Swanepoel, wie se toestand gister (Woensdag, 23 Julie) baie ernstig was, is reeds geopereer. Hy het ’n breuk in sy skedel van sowat 13?cm waar hy met ’n vuurwapen geslaan is. Sy vrou is ook oor die kop geslaan, maar het ligter skedelbreuk. Sy ly aan erge skok.
Mnr. Johan du Plessis, veiligheidskoördineerder vir Bothaville en Vierfontein, het gesê boere het ’n veligheidsplan in werking gestel en een verdagte is in ‘n bos vasgetrek.
Mnr. Jan Grobler, ook van die veiligheidskomitee, sê die boere het briljant saamgewerk. “Ek is bitterlik trots op hulle. Ons het lanklaas só ’n ongelukkige voorval gehad, maar hier is die bewys dat die boere reg is.”
Lees die volledige berig op Beeld se webwerf.
