Die groei in die wêreldbevolking en ’n vraag na gesonder en smaakliker vleis het ’n groter fokus op dierevoeding tot gevolg.
Verbruikers wil meer ingelig word oor waar hul voedsel vandaan kom en watter prosesse vir voedselveiligheid en gesondheid gebruik is.
Mnr. Nick Smit, adjunkhoof van Alltech in Afrika en die Midde-Ooste, sê voeding moet aangewend word om diergene te stimuleer wat tot voordeel van die mens se voeding sal lei. “Dit is soos om ’n ligskakelaar aan te skakel. Deur dít wat jy voer wil jy die regte geen wat reeds in die dier voorkom, stimuleer sodat ’n beter produk gelewer kan word.”
Smit sê die eerste 92 uur van ’n dier se lewe is baie belangrik om te verseker dat die regte gene gestimuleer word.
Selenium
Intussen het die Europese Kommissie die afgelope maand ’n aansoek dat gesondheidsvoordele met die aanwending van organiese selenium in diere se voedsel, op dierprodukte aangebring mag word. Luidens ’n verklaring het ’n intensiewe proses, wat wetenskaplike navorsing oor die voordele wat dié praktyk vir mense inhou, dié goedkeuring voorafgegaan.
Alltech het aansoek gedoen dat dié eise bekend gemaak moet word, veral met die gebruik van hul produk Sel-Plex® wat by diere se voer gevoeg kan word.
Die gesondheidsvoordele mag slegs in die Europese Unie aangedui word op produkte waar selenium by die dier se voer bygevoeg is.
“Deur dit te doen skep die landboubedryf ’n unieke geleentheid om suiwel-, vleis- en eierprodukte op die mark te onderskei, en terselfdertyd by te dra tot verbruikers se gesondheid en algemene welstand,” lui die verklaring.
Mnr. Patrick Charlton, adjunkhoof vir Alltech in Europa, sê die praktyk sal mens én dier se gesondheid verbeter.
