“Elke druppel water tel vir ons. Ons besproeiing is baie nougeset. Ons doen presisie-besproeiing. Daardeur kon ons die afgelope twee jaar ons sitrusproduksie normaal hou, wat wonderlike genade is. Ons span ook alle bronne in vir water, soos boorgat- en bergwater, en spits ons toe op reënwaterherwinning van kweekhuise.”
Hy sê hoewel daar altyd onsekerheid is wanneer jy plant of jy genoeg water sal hê om die gewas in geld om te sit, kan boere in die Gamtoosvallei nie ophou produseer en kunsmis gee nie, want “as jy nie plant met geloof nie, is jy verseker van ’n misoes”.
Me. Laurika Ferreira, ’n sitrusboer van Erfprag in dieselfde omgewing, sê die min reën het hul oes met meer as 30% laat daal. “Verlede jaar het ons twee boorgate gesink en, hoewel dit nie die gehalte van rivierwater is nie, hou dit darem die bome aan die lewe. Ons doen deeglike beplanning van waar en hoeveel water ons moet gee.
